15.09.2021

Fólkatingslimir vitjaðu Fuglafjarðar kommunu í dag

Fyrrapartin í dag vitjaðu limir í danska fólkatinginum Fuglafjarðar kommunu. Talan er um afturvendandi kunningarferð, sum danska fólkatingið skipar fyri, har fólkatingslimir úr ymsum politiskum flokkum eru í Føroyum og kunnað seg um føroysk viðurskifti. Tað er Ríkisumboðið, ið samskipar ferðina hjá fólkatingslimunum.

Dávur Juul, borgarstjóri, bjóðaði fólkatingslimunum vælkomnum í býráðssalinum fyrrapartin umleið kl. 09:00, har hann hevði eina framløgu um kommununa. Síðani hevði Rólant Højsted, havnastjóri, eina framløgu um virksemið á havnalagnum. Úr býráðssalinum var farið at vitja P/f Pelagos, har Jóhan Páll Joensen, stjóri, hevði eina framløgu og høvið varð at síggja framleiðsluna. Síðani fór ferðalagið í Fuglafjarðar skúla, har Berlys Nordendal, skúlastjóri, saman við lærarum og næmingum, hevði fyrireikað sangframførslu og framløgu um integrasjónsarbeiði í skúlanum. Rúni Abrahamsen, arkitektur og byggleiðari, greiddi fólkatingslimunum frá um nýggja barnaskúlan. Vitjanin hjá fólkatingslimunum endaði um middagsleitið á Kambsdali hjá fyritøkuni P/f JT Electric, har Suni Justinussen, stjóri, hevði ein framløgu um virksemið og kommunan bjóðaði miðmála.

Samanumtikið ein væleydnað vitjan hjá fólkatingslimunum í Fuglafjarðar kommunu í dag.